ШО ЧЕКАТЕ БЕ?

Вработените во Македонија бараат 11-та плата

Скопје, април (Коза ностра) Вработените во Македонија бараат работодавачите да им ја исплатат 11-тата плата, јавуваат домашните медиуми. Ако не им се исполнат барањата, тие најавуваат дека за Први мај масовно ќе излезат на улици и ќе си шепотат нешто во брада.

– Подготвени сме да го радикализираме протестот, односно да прибегнеме кон општа апатија. Ние си ги знаеме своите права. Долго се боревме да ни се дава 11-плата и немаме никаква намера да попуштиме, освен ако тоа не е нужно за каузата – вели Веле Лековски, од Иницијативата „11-та плата“.

Министерот за труд и социјална политика Диме Спасов вели дека барањата на работниците се разумни, ама несфатливи.
Извршниот директор на Европскиот економски институт „Тања Каракамишева“ од Дедебалци, Братислав Димитров, вели дека ситуацијата не смее да се потценува.

– Државата е во голем проблем. Познато е колку се работниците сложни и единствени во своите барања, а имаат и голема поддршка во населението. Ако не им се исполнат барањата може да се очекува нов бран на масовно чекање на подобро утре – вели Димитров.

Ако не им се исполнат барањата, работниците најавија масовно вербално изразување на сопствениот револт, во простории каде што „шефот не’ може да не слушне“. Исто така, се очекува масовно префрлање на вината од домашната економија на светската економска криза и обратно.

http://www.kozanostra.net/vrabotenite-baraat-11-ta-plata/