ХРАНА

Судбината на народот зависи од начинот на којшто луѓето се хранат.

Готвач се станува, но мајстор за печење се раѓа!

Десертот без сирење е како убавица на која ѝ фали едно око.

Парот сладокусци имаат барем еднаш дневно можност за пријатно дружење, бидејќи дури и оние кои одвоено спијат (а многу ги има) јадат заедно.

Сладокуството е една од најтемелните врски во општеството.

Со мајонезот може да се направи сè, освен да се седне врз него.

Кој вели „тартуф“, изговара голем збор кој буди еротични и гурмански спомени кај полот кој носи фустани, а гурмански и еротични кај полот кој носи брада.

Накусо, тартуфот е дијамант на кујната.

Оброк без вино е како ден без сончева светлина.

(Секој Први април, на роденденот на Жан Антелм Брија‒Саварен, во неколку земји се одржува Меѓународниот фестивал на јадливата книга.)

На гости на маса јадењето им се служи од лева страна, а пијалакот од десно.

Јадењето прво ѝ се послужува на женската особа која седи десно од домаќинот.

При послужување риба се претпоставува дека гостинот е дешњак. Главата на рибата на чинијата треба да лежи лево, опашката десно, а стомакот кон гостинот.

Никогаш не послужувајте повеќе од пет видови сирења наеднаш!

Приказни за имињата

Авокадо (ahuacatl) на јазикот нахуатл значи „мудовец“, стебло со муда, бидејќи неговите јајчести плодови растат во пар. За време на траењето на бербата на авокадо ацтечките девици не смееле да излегуваат од дома.

Друго име за авокадо е крокодилска крушка, веројатно поради набораната зелена кожа.

Мезе е грчки збор, односно персиски; маренда е италијански, закуска руски, а ужина германски збор.

Од ацтечкиот јазик нахуатл до нас стигнале некои зборови за храна: xocoatl - чоколада, tomatl - домат, ahuacatl - авокадо, chilli - чили и cacahuatl - какао. Зборот за ванила, tlilxochitl, за среќа, не сме го задржале.

Зборот ванила доаѓа од шпанскиот збор vainilla, „мали корици за меч“, „тоболче“.

Зборот мармелад доаѓа од португалскиот збор за дуња marmelo.

Шпанско-мексиканската надреалистичка сликарка Ремедиос Варо има слика под наслов: Вампири вегетеријанци.

Логотипот на лижавчињата Chupa Chups го направил Салвадор Дали.

Карпачото (Carpaccio) го добило името по ренесансниот сликар Виторио Карпачо, бидејќи својот креатор Џусепе Киприани, сопственикот на култниот ресторан Harry's Bar во Венеција, бојата на сировото говедско го потсетила на нијансата на црвена боја која славниот сликар често ја употребувал.

На истиот начин Киприановиот најпознат коктел, Белини, го добил името по Џовани Белини, поради сличноста на бојата на коктелот со праски со бојата на човечката кожа од сликаревите слики.

Кога сакаат да кажат „Гледај си ја својата работа!“, Французите велат „Занимавај се со својот кромид!“ (Occupe tois de tes oignons!)