Слободата на медиумите

Репортери без граници: Македонија падна на 123 место во слободата на медиуми

Македонија повторно падна за уште седум позиции во најновиот индекс за слобода на медиумите кој секоја година го објавува организацијата „Репортери без граници“.



Во последните години земјава направи огромен пад во слободата на медиуми за над 80 места подолу и откако минатата година беше на 116 место, годинава повторно падна на 123 позиција. За споредба, во 2009 година земјава на истата листа беше на 34 место.

Од регионот, Македонија, Црна Гора и Турција на мапата се обоени во црвено, односно спаѓаат во категоријата земји во кои слободата на медиумите е во тешка состојба. Сепак Македонија е најлошо рангирана од целиот регион и според слободата на медиуми е во друштво со Авганистан, Конго, Мали, Непал, Алжир, Колумбија, Јужен Судан, Таџикистан…

Во категоријата земји каде слободата на медиумите е со забележливи проблеми се Србија која е на 54. позиција, односно 69. места пред нас, потоа Косово на 80. место, Албанија на 85. место. Овие земји имаат напредок, додека пад е забележан кај Грција и Бугарија кои се наоѓаат на 99. и 100. место.

Во делот за Македонија стои дека иако земјата спроведува реформи за патот кон Европската унија, сепак „ѕидот на демократија во изминатите години не може да ги сокрие бројните прекршувања на слободата на инфомации“.



Репортери без граници го споменува судскиот случај со новинарот Томислав Кежаровски кој беше држен во притвор неколку месеци за потоа да добие домашен притвор.

„Но, следниот ден откако се случи тоа, „друг македонски новинар, Зоран Божиновски, беше уапсен во Србија по потерница од Интерпол за шпионажа. Познат како „македонскиот Џулијан Асанж“, Божиновски е автор на голем дел истражувачки стории за Сашо Мијалков, директорот на македонското разузнавање и роднина на премиерот Никола Груевски“, пишува во извештајот на Репортери без граници.

Пад на листата бележат и САД поради гонењето на Едвард Сноуден и судскиот процес против Бредли Менинг и сега САД се на 46-тото место.

Финска, Холандија, Норвешка, Луксембург, Андора ги држат првите пет позиции. Обединетото Кралство е на 33-та позиција, Словенија е 34-та , додека БиХ се најде на 66 место.

- See more at: http://www.radiomof.mk//reporteri-bez-granitsi-makedonija-padna-na-123-mesto-vo-slobodata-na-mediumi/#sthash.WbVWjYic.dpuf

Новинари, утре во 11 часот пред Суд за Кежо!



Претставници на Здружението на новинари на Македонија, Самостојниот синдикат на новинари и медиумски работници и Иницијативниот одбор за ослободување на Кежаровски ги повикуваат новинарите да дојдат и заедно да го изразат револтот од одлуката на Апелациониот суд новинарот Томислав Кежаровски да лежи 2 години затвор.

Новинарите утре во 11 часот ќе дадат изјави за медиумите во врска со одлуката на Апелациониот суд, со која првостепената казна од 4,5 години затвор за новинарот Томислав Кежаровски се намалува на 2 години.

http://plusinfo.mk/vest/11439/novinari-utre-vo-11-casot-pred-sud-za-kezo

(ФОТО) Новинарите изработија карикатура за премиерот Груевски

Новинарите во моментов се пред Влада каде што протестираат против пресудата на Апелација која му одреди 2 години затворска казна на новинарот Кежаровски, а во првите редови е самиот тој со своите колеги.

Тие имаат изработено карикатура на премиерот Никола Груевски, кој порачува дека медиумскиот простор е задушен, а медиумите страдаат под негова палка.

Новинарите велат, денеска пред Влада сакаат лично да му ја доделат карикатурата.





http://novatv.mk/index.php?navig=8&cat=2&vest=19584

Кежаровски нема да лежи затвор, доби условен отпуст

Новинарот Томислав Кежаровски е ослободен од издржувањето на преостанатиот дел од казната за затвор на којашто беше осуден за откривање на идентитетот на заштитениот сведок, јави МИА.

Кривичниот совет на Одделението за организиран криминал во текот на вчерашниот ден на јавна седница одлучувал по предлогот на директорот на КПУ Затвор Скопје - Скопје за условен отпуст на осудениот Томислав Кежаровски и донел решение со кое го уважил предлогот на директорот.

Со решението, Кежаровски се отпушта на ден 18 февруари, односно нема потреба да се јавува во затворот откако беше пуштен поради влошена здравствена состојба, а времето на условниот отпуст трае до 27 јуни, односно до истекот на издржувањето на казната.

„Оваа одлука Судот ја донесе согласно член 200, 201, 202 и 203 од Законот за извршувањето на санкции како и член 36 од Кривичниот законик, бидејќи осудениот веќе издржал повеќе од половината од казната затвор, а притоа водејќи сметка за неиздржаниот дел од изречената казна, дека за времето на издржувањето на казната, а особено во период додека тој бил во притвор во истата оваа установа, покажал беспрекорно и примерно поведение, како и влошената здравствена состојба на осудениот заради која со решение на Управата за издржување на санкции му е одреден прекин на издржувањето на казната затвор во траење од 30 дена“, се наведува во денешното соопштение од Судот.

Против ова решение дозволена е жалба во рок од осум ден, по приемот на решението преку овој Суд до Апелациониот суд Скопје.

Кежаровски беше осуден на четири и пол години затвор за откривање на идентитетот на заштитениот сведок во случајот Ореше.

Апелациониот суд му ја намали казната затвор на две години. Со оглед на тоа што на новинарот му се сметаше времето поминато во притвор, му остануваа уште помалку од четири месеци затвор од казната.

Веднаш по одлуката беше спроведен на издржување на казната во затворот во Шутка, но беше ослободен поради влошената здравствена состојба.

Кежаровски беше ослободен токму на денот кога се одржа протест против казната затвор на новинарот. Колегите бараа ослободителна пресуда.

http://plusinfo.mk/vest/12120/kezarovski-nema-da-lezi-zatvor-dobi-usloven-otpust

АЈДАРИ: ШЕСТЕ ТУЖБИ ПРОТИВ НОВИНАРИ СЕ ЗА ДЕН НА ЖАЛОСТ ВО МАКЕДОНИЈА



Директорот на дневниот весник "Лајм" Фејзи Ајдари вчера реагираше за најавите за две тужби против "Лајм", три против порталот "Алмакос" и една против порталот "Тетовасот" од пратеникот на владејачката ДУИ Артан Груби.

Ајдари вели дека дента кога Груби ги најави тужбите треба да се прогласи за ден на жалост за новинарите и за новинарството во Македонија, но истовремено, и за ден на срамот за политиката, бидејќи во еден ист ден, еден пратеник најави најмалку шест обвиненија против медиуми, а се пофали, вели Ајдари, дека ќе има повеќе.
"Место да се служи со силата на аргументот, Груби решил да се служи со аргументот на силата. Место да реагира цивилизирано и аргументирано на нашите наводи, кои тој ги смета за погрешни, решил да побара извинување од наша страна, со закана дека ќе нe тужи. Ние ќе го разгледаме неговото барање да се извиниме, но при носењето на конечната одлука ќе ги имаме предвид извештаите на Европската комисија, кои содржат доста забелешки за правосудниот систем во Македонија. Но, пред сe, ќе ја земеме предвид и изјавата на министерот за правда Аднан Јашари, кој рече дека судството во Македонија не е независно", најави директорот на весникот.
Ако не добие извинување, Груби сака да ги тужи овие медиуми за клевета за наводите во текст во кој се тврди дека проруските сили подготвуваат украинско сценарио во Македонија, оти е наречен шпион и со други навредливи зборови. (С. К. Д.)

http://www.vest.mk/?ItemID=018D9499055913468AE0503C891B3F85

Аудио-Цензурата во МРТВ мора да престане

Самостојниот синдикат на новинари и медиумски работници е запрепастен и згрозен од упадот во програмата и легитимирањето на водителот на емисијата на Канал 103 во МРТВ. Сметаме дека станува збор за директна, груба цензура која компплетно ја соголува драмтичната состојба со слободата на информирањето во МРТВ. Никакви правила и процедури не можат да го сокријат фактот дека на водител на емисија му е оневозможено на најгруб и насилнички начин да ја врши својата работа. На отворен микрофон го слушнавме „обезбедувањето“ на МРТВ како без каква и да е задршка го легитимира водителот и го отстранува од програмата. ССНМ најостро го осудува ваквиот чин и бара одговорност од раководството на МРТВ, како и објаснување чие обезбедување влегло во програма на отворен микрофон, на МРТВ или на приватна компанија за обезбедување?

ССНМ за овој инцидент ќе ги информира сите меѓународни новинарски организации, вклучително и Меѓународната и Европска федерација на новинарите.

Воедно ССНМ по вчерашниот инцидент искажува јавна поддршка на акциите и протестите за начинот на работата на јавниот сервис и ги повикува сите новинари и медиумски работници целосно да се солидаризираат со колегите во МРТВ и да го искажат својот револт за состојбата во која се доведени нашите колеги. Ова не може и не смее вака да продолжи.

Еве и аудио снимка од синокешниот упад во програмата на култното радио 103 од лице од обезбедувањето на МРТВ кое спречи генералот Стојанчо Ангелов да биде гостин во емисијата ..

http://libertas.mk/%D0%B0%D1%83%D0%B4%D0%B8%D0%BE-%D1%86%D0%B5%D0%BD%D0%B7%D1%83%D1%80%D0%B0%D1%82%D0%B0-%D0%B2%D0%BE-%D0%BC%D1%80%D1%82%D0%B2-%D0%BC%D0%BE%D1%80%D0%B0-%D0%B4%D0%B0-%D0%BF%D1%80%D0%B5%D1%81%D1%82%D0%B0/